يوميات زوجه مفروسه

اذهب الى الأسفل

يوميات زوجه مفروسه

مُساهمة من طرف ياسمين في الإثنين مايو 05, 2008 1:18 pm

بســم الله الـرحمــن الرحيــم

السلام عليكــم ورحمـة الله وبركاتــة ،،

انا قرأت الموضوع ده فى احد المنتديات وهو عبارة عن يوميات زوج وزوجة كل يوم حكاية الموضوع لذيذ جدا وفكاهى اتمنى يعجبكم

الموضوع من مدام طهقانه زوجه زى السكر ودمها شريات

احلى حاجه فيها انها يتاعالج الامور بطريقه لذيذه وعصريه والاجمل انها رغم عمايل الاستاذ طهقان الاانهابتحيه جدا ربنا يهنيهم يارب

*******************************************************************

كنا قاعدين في الفود كورت في مول كبير انا وهو على ترابيزة واحدة والاولاد راحو يلعبوا و مستنيين واحد صاحبه ومراته عازمينهم على العشا
و احنا قاعدين مستنيينهم قام يشتري سوفت درينك قبل ما ييجوا وساب موبيله اخذت الموبيل ودعبست فيه لقيته كاتب اسمه في البلوتوث: الجامد
ايه يا ابن الايه جامد ايه ييجوا يشوفوا
رجعت الموبيل زي ما كان ولا كاني شفت حاجة وشوية و رجع وشوية كمان وصاحبه ومراته وصلوا وانقسمنا فريقين الستات على ترابيزة والرجاله على ترابيزة
وانا قاعدة معاها فتحت البلوتوث بتاع موبيلي وكتبت الاسم: احب الجامد
ورحت باعتاله مسج دلع لقيته استقبلها وراقبته لقيت عنيه لمعت وبانت عليه السعادة
طيب لما نشوف حتوصل لحد فين
راح باعتلي مسج فيها رقم موبيله و سميل فيس
اوبّا.. بقى كده طيب استنى عليا اما لعبّتك على الشناكل
********
طلبت من صاحبتنا نقوم نتمشى ونلف على محلات الاكسسوارات وانتهزت الفرصة و دخلت محل موبيل و اشتريت خط هوليداي من اللي بيشتغل 45 يوم و يفصل.. ورحت مزوغة من صاحبتنا وهي بتسأل على اسعار حاجات في المحل و طلبته و غيرت صوتي وكلمته بدلع واخنفيت
اصل انا لما اتدلع اخنف الله يمسيكي بالخير يا سكيننة
أنا: النووووو
هو(بدهوله و هطل): ا لل للو ايوة
أنا: الجامد؟
هو: اهلا اهلا
أنا: اسيك؟
هو: كويس ازيك انتي؟
أنا: كويسه انت قاعد فين ؟
هو: انا في الفوت كورت قدام محل ...... و ..و
أنا: ده انت قاعد قريب مني بقى
هو: اه.. بس انا قاعد مع واحد صاحبي
أنا: لابس ايه يا جامد
هو: لابس قميص ...و
أنا: اه شايفاك ده انت هاندسم خالص مالص
هو(بضحكة بلهاء): هاهاها متشكر يا قمر
عرف منين اني قمر الكذاب.. استنى عليا
أنا: طيب اشوفك تاني ازاي؟
هو: اتصلي بيا بس قبل 4 العصر بس استني انت قاعدة فين و لابسة اية و ..و
أنا: اشمعنى بعد 4 انت متجوز؟
هو: لا لا لا...بس علشان نبقى براحتنا
يانهار مش فايت.. امال 11 سنة جواز دول اية؟ والعيال اللي ملقحة دول مين؟
أنا: طيب يلا باي بقى
هو: استني عايز اشوفك انت قاعدة فين؟ و..و
انا قفلت الخط و بقيت عايزة اشتري ايد هون وانزل بيها على نافوخه بس مسكت نفسي
********
رجّعت الشريحة بتاعتي في الموبيل و اتصلت بصاحبتنا ورجعنا قعدنا على الترابيزة معاهم وكبست على نفسه لحد ما روحنا وهو طول القاعدة عينه زايغة و عمال يبص على كل واحدة حولينا فاكرها هي االلي اتصلت.. وانا قاعدة جانبه و لا حاسس بيا
و احنا مروّحين لقيته منشكح و منهرش و عمال يصفر ويطبل على الدريكسيون اكنّ فرح خالته
عاملت روحي مش مركزة و قعدت اتكلم مع العيال في اي كلام
تاني يوم.. راح الشغل و على الساعة 11 اتصلت بيه من الشريحة اياها
أنا: النوووو
هو: اهلا يا جميل
أنا: وحشتني
هو: انتي اكتر كده برضه متخلنيش اشوفك
أنا: استنى بس مش نتعرف الاول وبعدين نتقابل
هو: طيب حشوفك امتى
يا نهارك مش فايت و كمان عايز تقابلها مع سبق الاصرار والترصد
أنا: انت عندك كام سنة؟
هو: 30 سنة وكام شهر
يا ابن الكذابة مواليد 60 و لسة 30 سنة ليه كنت واخد عشر سنين اجازة رضاعة طفل
أنا: ياه انت كبير عليا انا 25
هو: وماله هو في احلى من كده
أنا: بس انا شايفة شعر ابيض في راسك امبارح؟
هو: ها ها ها ها لا ده من الخضة
أنا: هيهيهيهيهي
بدلع بس من جوه بابور مولع
هو: طيب انت بتشتغلي فين؟
أنا: حسب ساعات و ساعات
هو: طيب
قاطعته: باي بقى اكلمك بكرة في نفس الميعاد
وقفلت الخط وانا مولعة وفاضلي لتر بنزين وانفجر
********
وفضلت كده اتصل اتدلع عليه و مديلهوش اي معلومات عني خمس ايام لحد يوم الخميس وطبعا سمعني كلام عجب و كذب يودي كلية الطب وقالي نكت عمره ما حكهالي وهراني مسجات معاكسة و ا وغرام و اخيرا فاض بيا وقلت لازم اكشفه قدام نفسه
اتصلت
أنا: النووو
هو: اهلا يا حبي
حبي؟!! و انا كل ما اتصل بيه و انا مراته يقولي نعم يا ماما و لو حد ساله مين يقوله... البيت
أنا: فاضي بكرة الصبح عندي تدريب في الناتي وعايسة اشوفك
هو: طبعا الساعة كام
أنا: 12 كويس؟
هو: اوك يا قمر
أنا: اوك سلام
هو: استني بس حعرفك ازاي؟
أنا: زي ما قلتلك قبل ده انا شبه نيكول سابا بس للصراحة عنيا مش زارقة عنيا خضرا وحكون لابسة شورت تنس وبادي بينك
هو: اتفقنا يا قمر
وطبعا انا حسيت بالريالة بتنزل على سماعة التليفون وهو بيقول العبارة الاخيرة دي.. استنى اما نشفت ريقك
ولما روّح سبع البرومبة قلتله عايزين نفسح الاولاد بكرة يا بيسو
قالي: لا بكرة مش فاضي عندي مشوار واحد صاحبنا عنده المرارة و حيعمل عملية و لازم اروح معاه علشان نعمل التحاليل اللي قبل العملية و..و...و
وعاملي قصة
قلتله: طيب اروح انا عند ماما بقى و لما تخلص ابقى تعالى اتغدى معانا
قالي: لا ما انا يمكن اتغدي معاه
كمان ناوي على غدا طيب حوقف اللقمة في زورك ان شاء الله
********
تاني يوم من الساعة 10 صحي و لبس و نزل مش عارفة ليه بدري كده بس احسن
اخدت العيال عند ماما وطلعت على النادي ولقيته مستني في المكان اللي اتفقنا عليه وعمال يتصل برقم الزبونة و انا مش مركبة الشريحة اصلا
اتصلت بيه من موبيلي و قلتله
أنا: انت فين يا بابا
هو: ايوة...بزهق... ما انا قلتلك مع صاحبي
أنا: طيب انا بس حبيت اقولك اننا رحنا النادي علشان ماما عندها ضيوف
هو: اتسرع و اتلجلج و انا شايفاه حط ايده على راسه.. وقالي: نادي ايه؟
قلتله: النادي الفلاني
اللي هو نفس النادي بتاع الرونديفوه
هو: ليه كده الجو برد العيال حتعيا خديهم و روحي احسن
أنا: طيب طيب
بس وعنها و ركبت شريحة الزبونة واتصلت بيه
أنا: النوووو
هو: انت فين يا جميل الساعة 2 مش تيجي بقى
أنا: انت فين بالظبط
هو: جنب ملعب التنس زي ما اتفقنا
أنا: طيب انا جايه اهو فايف منتس
هو: اوك
بحماس منقطع النظير
و رحت واخده بعضي و عملت هجوم مباشر عليه من الخلف
وقلتله: بيسوووو انت هنا
هو اتلهى و بقى عرقه مرقه و قالي انت ايه جابك هنا
أنا: انا روحت العيال علشان البرد و قلت اجي الف التراك الله امال فين صاحبك.. وايه التسريحة الجميلة دي؟؟ انت رحت عند الحلاق؟ و صبغت كمان.. واو صغرت 5 سنين يا مضروب
هو: الفار لعب في عبه و قالي لا.. اصله.. اصل.. تعالى نروح ناخد العيال و نتغدى بره
انا دوست على ريديل وانا واقفة معاه من شريحة الزبونة واستمتعت بوشّه وهو بيجيب الوان والعرق بيفط من سحنته وهو حاسس ان البت جت وحتطب علينا
قالي: يلاّ يلاّ الجو برد النهاردة
قلتله: مش حترد على التليفون
قالي: مش مهم بقى
قلتله: طيب استنى حروح التويلت و ارجعلك
قالي: طيب
و انتهز الفرصة وراح متصل على رقم الزبونة
رديت بصوتي الأصلي
أنا: الو
هو: بتردد..........انت فين؟
أنا: ما انا لسة قايلالك رايحة الحمام
هو: ايه.......... بصدمة
أنا: انت لسه معرفتش يا مدهول اني بشتغلك من اسبوع عاملي فالنتينو يا بيسو.. طيب قبل ما تبص بره بص جوه.. سلام بقى علشان رايحة اقابل الواد بتاعي
و طلعتله لساني بمنتهى الانشراح.. اللي يضحك في الاخر هو اللي يضحك اكتر
و قفلت التليفون ورحت عند واحدة صاحبتي اتغديت معاها وسبته طول اليوم يضرب روحه تلاتين صرمة
********
الرسالة اللي الجاية حقولكم عملت فيه ايه بعد كده
محدش يقولي سيبيه لاني بحبه رغم حركاته اللي تطهق.. بس.. بحبه

ايه رأيكم بقى

الى اللقاء فى حلقة تانيه
avatar
ياسمين
مشرفة قسم المرأه
مشرفة قسم المرأه

عدد الرسائل : 8
تاريخ التسجيل : 05/05/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: يوميات زوجه مفروسه

مُساهمة من طرف روميو توب في الإثنين مايو 05, 2008 1:30 pm

ههههههههههههه


ماشى يا اخت ياسمين بس ياريت نهده شويه على الرجاله

ولا حظى ان المنتدى كل اعضاؤه ذكوووووووووووور


ههههههههههههههههههههه

_________________
avatar
روميو توب
المدير العام للمنتدى
المدير العام للمنتدى

عدد الرسائل : 270
العمر : 30
تاريخ التسجيل : 08/04/2008

معاينة صفحة البيانات الشخصي للعضو http://romeotop.ahlamontada.com

الرجوع الى أعلى الصفحة اذهب الى الأسفل

رد: يوميات زوجه مفروسه

مُساهمة من طرف ريم في الأربعاء أغسطس 06, 2008 10:01 am

بصراحه قصه حلوه كتير
بس مش شرط تسيبه
شكرا الك على هالقصه الحلوه

ريم
مشرفة قسم المرأه
مشرفة قسم المرأه

عدد الرسائل : 2
تاريخ التسجيل : 06/08/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: يوميات زوجه مفروسه

مُساهمة من طرف روميو توب في الأربعاء أغسطس 06, 2008 10:12 am

منوره يا ريم وان شاء الله تنورى القسم على طول

_________________
avatar
روميو توب
المدير العام للمنتدى
المدير العام للمنتدى

عدد الرسائل : 270
العمر : 30
تاريخ التسجيل : 08/04/2008

معاينة صفحة البيانات الشخصي للعضو http://romeotop.ahlamontada.com

الرجوع الى أعلى الصفحة اذهب الى الأسفل

رد: يوميات زوجه مفروسه

مُساهمة من طرف krawan2 في الإثنين فبراير 02, 2009 11:51 pm

بصراحة هيا قصة حلوة بس الى فى المنتدا احلا

krawan2
مشرف قسم الكمبيوتر والانترنت
مشرف قسم الكمبيوتر والانترنت

عدد الرسائل : 9
تاريخ التسجيل : 25/01/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: يوميات زوجه مفروسه

مُساهمة من طرف krawan2 في الجمعة فبراير 20, 2009 1:54 pm

ااااااااااااااااااااااااااااااااااااااااااااااااا


عدل سابقا من قبل روميو توب في السبت مارس 14, 2009 9:05 am عدل 1 مرات (السبب : كلام غير لائق بالمنتدى)

krawan2
مشرف قسم الكمبيوتر والانترنت
مشرف قسم الكمبيوتر والانترنت

عدد الرسائل : 9
تاريخ التسجيل : 25/01/2009

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى